श्री धनलक्ष्मी आणि श्रीयंत्रपूजन उत्सव

श्री धनलक्ष्मी आणि श्रीयंत्रपूजन उत्सव

Dhanalakshmi Poojan
श्रद्धावानांनो गुरुभक्ती वाढविणारे, आई आल्हादिनीची प्रेमकृपा वृद्धींगत करणारे, षोडस ऐश्वर्याचा मार्ग सुलभ करून देणारे आणि सदगुरु श्री अनिरुद्धांनी सिद्ध केलेल्या श्रीयंत्राचे दर्शन व पूजन (अर्चन) करून महात्रिपुरसुंदरी आई आल्हादिनीची कृपा प्राप्त करुन घेऊया.

सर्वप्रथम आपण श्रीयंत्राचा महिमा जाणून घेऊया.

श्रीयंत्र म्हणजे "श्री" चे यंत्र. श्रीचे घर. श्री म्हणजे "श्रीविद्या". ललिता, महात्रिपुरसुंदरी षोडशी आणि कमला कामेश्वरी ही माता श्री विद्येचीच नाव आहेत. श्रीविद्येचे एक नाव "क्रियात्मक ब्रह्म" अस आहे. म्हणजे ह्या सृष्टीची प्रत्येक क्रिया ह्या श्रीविद्येच्या नियम सामर्थ्याप्रमाणेच चालते. म्हणून श्री म्हणजे श्रेष्ठता, श्री म्हणजे पूजनीय आणि श्री म्हणजे षोडस ऐश्वर्य प्राप्तीचे साधन.

ह्या विश्वाचे संपूर्ण शक्तिसामर्थ्य आणि ऐश्वर्य "श्री"च्या अधिन आहे. म्हणून मानवाला महत्रिपुरसुंदरी असलेल्या आईचे प्रेम, तिचे षोडश ऐश्वर्य व शक्तिसामर्थ्य प्राप्त करून घेण्यासाठी श्रीयंत्राची उपासना व पूजन अत्यंत फलदायी मार्ग आहे. तसेच ते गुरुभक्ती वाढविणारेही आहे.

सदगुरु कृपेमुळे श्रीयंत्र श्रद्धावानांना उत्तम फलप्राप्ती करून देते. श्रीयंत्र केवळ घरात जरी ठेवले तरी ते लाभदायी आहे, तर त्याचे श्रद्धापूर्वक पूजन व दर्शन मानवासाठी इच्छातृप्ती करणारे आहे. म्हणून श्रीयंत्राला अर्थात श्रीविद्येला शरण जाऊन "श्री"च्या शक्तीचा आनंद घेणे हाच स्वहित साधून घेण्याचा उत्तम मार्ग आहे.

धनलक्ष्मी पूजनाच्या दिवशी श्रीयंत्र पूजनाची व दर्शनाची संधी श्री हरिगुरुग्राम म्हणजेच न्यू इंग्लिश स्कूल , वांद्रे (पूर्व) येथे सकाळी ९ ते रात्रो १० वाजेपर्यंत श्रद्धावानांना प्राप्त झाली आहे.

तसेच सदगुरु श्री अनिरुद्धांनी सिध्द केलेले श्रीयंत्र आपल्याला घरी ही उपासना करण्यासाठी उपलब्ध झालेले आहे.
"रुद्रायामल" ग्रंथामध्ये श्री यंत्राच्या दर्शनाने जी फलप्राप्ती होते त्याचे सुरेख वर्णन केले आहे. आपल्यला "रुद्रायामल" ग्रंथ सांगतो की, सर्व तीर्थस्थळे व मंदिरे यांच्या दर्शनाने तसेच १६ प्रकारची व्रते करून जी फलप्राप्ती होते त्यापेक्षा अधिक फलप्राप्ती होते त्यापेक्षा अधिक फलप्राप्ती श्री यंत्राच्या नित्य दर्शनाने होते.

अशा सदगुरु श्री अनिरुद्धांनी सिद्ध केलेल्या श्रीयंत्राची रचना कशी आहे ते आता आपण बघूया. श्रीयंत्राच्या मध्यभागी सर्वश्रेष्ठ महाशक्ती श्रीविद्या, महालक्ष्मी, महात्रिपुरसुंदरी विराजमान झालेली आहे.

श्रीयंत्रात चार परमेश्वर स्वरुप उर्ध्वाशिर्ष त्रिकोण आहेत. पाच शक्तीरुप अधोशिर्ष त्रिकोण आहेत. असे एकूण नऊ त्रिकोण मध्यबिंदुच्या विविध दिशांना आहेत. तसेच ह्या श्रीयंत्रामध्ये एकूण ४३ त्रिकोण आहेत व प्रत्येक त्रिकोणा  त देवीचे निवास आहे. हा त्रिकोण समुह अष्टदलचक्रांनी परिपूर्ण असतो, ज्याच्या बाहेर षोडशदल, त्रिवलय आणि सर्वांच्या बाहेर भूपुर म्हणजे चतुष्कोन आहे.

श्री यंत्रात असलेले २४ संधी व २८ मर्म आहेत. म्हणजे काय? व त्यांचे कार्य काय आहे? ते आपण आता बघुया. दोन रेषांच्या संगमाला संधी म्हणतात आणि तीन रेषांच्या संगमाला मर्म म्हटले जाते. सन्धि आणि मर्म ही श्री चक्राची स्पंदन प्रक्षेपक केंद्र आहेत.

श्री चक्राच्या अष्टदल कमलामध्ये अष्टलक्ष्मीचा निवास असतो. . त्या अष्टलक्ष्मी कोणत्या? तर
१) आणिमा - श्री वरदलक्ष्मी
२) लधीमा - श्रीधनदालक्ष्मी
३) प्रकाम्य - श्रीपद्मलक्ष्मी
४) वचिता - श्रीकमलालक्ष्मी
५) महिमा - श्रीमहालक्ष्मी
६) प्राप्ती- श्रीश्रेष्ठालक्ष्मी
७) इशिता - श्रीवसुधालक्ष्मी
८) ख्याती- श्रीकाम्यालक्ष्मी
तसेच चक्राच्या षोडशदलात सोळा कुबेर राहतात. श्रीयंत्रातील कुबेराची उपासना त्वरित फलदायी आहे.

पूजन केल्यानंतर श्रीयंत्र आपल्या देवघरात किंवा द्रव्यपेटीमध्ये ठेवू शकतो. श्रीयंत्राच्या केवळ अस्तित्वामुळे आपल्याला लाभ होऊ शकतो. आपल्या घरी कुंकू, अक्षता, सुगंधीत पुष्प आणि सुगंधी धूप ओवाळून आपण ह्याची पूजा करू शकतो. व  त्यानंतर दूध, खीर, किंवा मिठाईचा नैवेद्य अर्पण करू शक्तो. श्रीयंत्र महाप्रेममयी आनंददायिनी श्रीमताचे घर असल्यामुळे व सदगुरु सिद्ध असल्यामुळे पूजन करताना काही चूक झाली तरी पूजकाला कोणतीही हानी होत नाही तर पूजकाला हे श्रीयंत्र लाभदायच ठरते.

श्रीयंत्रासमोर बसून नियमितपणे किंवा आपल्या इच्छेनुसार कोणते जप करू शकतो?
१. ॐ श्री र्‍हीं क्लीं र्‍हीं महालक्ष्मै नमः।
२. ॐ र्‍हीं सकलसर्वभूषितां ललीतादेवी नमामि।
३. ॐ र्‍हीं महात्रिपुरसुंदरी दैव्यै नमो नमः ।
४. ॐ श्री कमले कमलालये प्रसीद प्रसीद श्रीं र्‍हीं ॐ महालक्ष्मै नमो नमः।
५. ॐ आल्हादिन्यै नंदायै संधिन्यै नमो नमः।
वरीलपैकी कोणत्याही एका मंत्राचे पठण करू शकता.
सदगुरु श्री अनिरुद्ध उपासना ट्रस्टतर्फे धनलक्ष्मी आणि श्रीयंत्रपूजन उत्सव कसा साजरा होतो?
सकाळी ९ वाजता १) श्रीयंत्र पूजन २) वैभवलक्ष्मी धनलक्ष्मी पूजन. ३) दत्तमाला मंत्र पठण व यज्ञ ४) श्रद्धावानांतर्फे श्रीयंत्राचे अर्चन (पूजन)

परमपूज्य सदगुरुंचे आगमन झाल्यावर, दर्शन सोहळा सुरु होण्याआधी सदगुरु स्वतः श्रीयंत्राचे पूजन व आरती करतात. श्रीयंत्राची आरती झाल्यानंतर प्रत्येक तासाला श्री महालक्ष्मीची आरती केली जाते. सदगुरु व त्यानंतर सदगुरु व त्यामच्या भक्तांचा प्रेमळ संवाद म्हणजेच दर्शन सोहळ्यास सुरुवात होते.

ह्या उत्सवाच्या दिवशी केंद्रांना दिल्या जाणार्‍या पादुकांची सिद्धता परमपूज्य सदगुरूच्या चरणकमल स्पर्शाने केली जाते व ह्यात सिद्ध पादुका प्रत्येक केंद्राला अधिवेशनाच्या वेळेस दिल्या जातात.

रात्रीच्या महाआरतीच्या वेळेस स्वतः सदगुरु दत्तात्रेयांची आरती करतात व त्यानंतर श्रद्धावान परपूज्य सदगुरुंची आरती करतात. महाआरतीनंतर सत्संग व गजराच्या जयघोषात उत्सवाची सांगता होते.
Samirsinh Dattopadhye